Monday, August, 19, 2024 | Madaxweynaha Dowlad Goboleedka Puntland, Mudane Siciid Cabdullaahi Deni, oo ku sugan magaalada Nairobi ee caasimadda dalka Kenya, ayaa kulan muhiim ah la yeeshay Safiirka Dowladda Mareykanka ee Soomaaliya, Amb. Richard H. Riley, iyo mas’uuliyiin kale oo ka tirsan safaaradda Mareykanka. Kulankan ayaa lagu gorfaynayey arrimo dhowr ah oo ku saabsan iskaashiga taariikhiga ah ee u dhexeeya Puntland iyo Mareykanka, gaar ahaan dhinacyada amniga, horumarinta, iyo maalgashiga.
Madaxweynaha Puntland iyo Safiirka Mareykanka ayaa si gaar ah ugu hadlay sidii loo xoojin lahaa dagaalka lagula jiro kooxaha argagixisada ah ee ka howlgala Soomaaliya, iyada oo Mareykanku uu qayb weyn ka qaadanayo taageerada dhismaha hay’adaha amniga ee Puntland. Madaxweynaha ayaa uga mahadceliyey Safiirka iyo dowladda Mareykanka doorkooda ku aaddan taageerada ay siiyaan Puntland, taas oo muhiim u ah amniga iyo horumarka gobolka.
Intii uu socday kulanka, Madaxweyne Deni waxa uu sidoo kale la wadaagay Safiirka iyo mas’uuliyiinta kale ee Mareykanka ku sugnaa cabashooyin ku saabsan khilaafka u dhexeeya Puntland iyo Dowladda Federaalka Soomaaliya. Deni ayaa si cad u sheegay in maamulka Puntland uu doonayo madaxbannaani buuxda oo ku aaddan mashaariicda Mareykanku iyo beesha caalamka ku taageeraan Soomaaliya, isaga oo ku dooday in Puntland ay xaq u leedahay in si madax-bannaan loogu wareejiyo taageeradaas.
Khilaafka u dhexeeya Puntland iyo Dowladda Federaalka ayaa xilligan ah mid sii xoogaysanaya, iyadoo Madaxweyne Deni uu doonayo in maamulka Puntland uu yeesho xiriir gaar ah oo ka duwan kan ay maamulada kale ee dalka ka jira la leeyihiin wakiilada beesha caalamka. Deni waxa uu ku adkeysanayaa in Puntland ay tahay gobol leh awood iyo karti gaar ah oo u baahan in si madax-bannaan loogu tixgeliyo mashaariicda horumarineed iyo taageerada caalamiga ah.
Dhinaca kale, kulankan ayaa sidoo kale diiradda lagu saaray mashaariicda horumarineed iyo maalgashiga Mareykanku uu ka wado Puntland. Madaxweynaha Puntland ayaa sheegay in maamulka uu hoggaamiyo uu diyaar u yahay in uu si dhow ula shaqeeyo Mareykanka iyo hay’adaha kale ee caalamiga ah si loo horumariyo kaabayaasha dhaqaale iyo adeegyada muhiimka ah ee bulshada. Waxa uu sidoo kale sheegay in Puntland ay leedahay khayraad dabiici ah oo u baahan in la maalgashado, si loo abuuro fursado shaqo iyo horumar dhaqaale oo waara.
Safiirka Mareykanka, Amb. Richard H. Riley, ayaa dhankiisa ku amaanay Puntland horumarka ay ku tallaabsatay, isaga oo ballan qaaday in Mareykanku uu sii wadi doono taageerada uu siiyo Puntland, gaar ahaan dhinacyada amniga iyo horumarinta. Waxa uu sidoo kale carabka ku adkeeyey muhiimadda ay leedahay wada shaqaynta iyo is-afgaradka labada dhinac si loo gaaro ujeeddooyinka guud ee amniga iyo horumarka.
Kulankan ayaa lagu tilmaamay mid muhiim ah oo xoojinaya xiriirka Puntland iyo Mareykanka, waxaana la filayaa in natiijooyin wax ku ool ah ay ka soo baxaan wada hadallada labada dhinac. Madaxweyne Deni ayaa ku nuuxnuuxsaday sida ay muhiimka u tahay in Puntland ay hesho taageero caalami ah oo madaxbannaan, taas oo fursad u siinaysa in ay sii wado dadaallada ay ku horumarinayso nabadda iyo horumarka gobolka.
